News

PROF. MBARAWA AITAKA BODI MPYA YA TAA KUSITISHA AJIRA ZA UPENDELEO

Posted On: Wednesday 26, October 2016

Akizungumza katika uzinduzi wa Bodi hiyo mpya jijini Dar es salaam pamoja na mambo mengine, Profesa Mbarawa ameisisitiza bodi hiyo kuifanyia kazi Ripoti ya Uchunguzi wa uendeshaji wa Viwanja hivyo nchini na kufanya mabadiliko mara moja.

“Nataka muipitie ripoti niliyomkabidhi Kaimu Mkurugenzi Mkuu na mufanyie maamuzi, suala la kuajiri watu kiholela, ninataka wote waliandikwa kwenye ripoti hiyo kuwa hawana sifa watolewe wapishwe watu wenye sifa ili waweze kufanya kazi”, amesema Waziri Mbarawa.

Aidha, Profesa Mbarawa ameitaka Bodi hiyo kusimamia kwa uadilifu miundombinu yote ya viwanja vya ndege nchini na kuhakikisha mashine za ukaguzi zinafanya kazi masaa 24 ili kudhibiti mianya yote ya rushwa.

Ameitaka Bodi hiyo kusimamia vizuri ukusanyaji wa mapato katika viwanja vyote ili kuweza kufikia lengo lililowekwa na kukuza uchumi wa nchi.

Aidha, Profesa Mbarawa ameitaka Bodi hiyo kushirikiana na wafanyakazi wa Viwanja hivyo katika mambo mbalimbali ili kuboresha utendaji na kuweka uwazi katika utoaji wa huduma katika viwanja hivyo.

Kwa upande wake Mwenyekiti wa Bodi hiyo, Profesa Ninatubu Lema amemhakikishia Waziri huyo kuwa ataongeza ushirikiano na wafanyakazi wote na kusimamia maagizo yote yaliyotolewa.

Ameahidi kuboresha huduma katika viwanja vyote nchini na kusema kuwaumuhimu wake utaongeza mapato katika viwanja hivyo na nchi kwa ujumla.